nakiskawik ôki owiyasowêwak

Marion Buller

kihci-owiyâsowêw

kihci-owiyâsowêw awa Buller nêhiyaw-iskwêw êkwa ê-pê-ohtohtêt Mistawâsis nêhiyaw-askînâhk ôta kisiskâciwanihk. ispîhk ôma 1994 kâ-kî-ispayik, kihci-wiyasowêw-ôkimâw kâ-itapit ôta British Columbia kâ-piskîhtastêk ôkimânâhk. kî-pôni-pimâtisiw owiyasowêwi-ôkimâw kêhci ôma 2016 askîwinihk. pâmwayês ka-nawasôniht ka-owiyasowêt ôma piskîhci-askiy kihci-owiyasowêw Buller kî-atoskawêw ôkimâwin êkwa mîna owiyasowêwinihk. wiya ôma ê-kî-owiyasowêt êwako ôma Cariboo-Chilcotin Justine Inquiry kê-icikâtêk. kihci-owiyasowêw Buller kî-itapiw êkwa kî-nîkânîw êkwa kâ-oyipayicikêt nistam-askîwiyiniw kêhci owiyasowêwinihk isi ka-kiskinohamâkêhk êkwa asici owiyasowêwin ita kâ-kîhci-astêk British Columbia piskîhcâyihk ôkimâwin.

kihci-owiyasowêw Buller kî-ka-kêskimiwêw êkwa mistahi kî-ma-masinahikêw êwak ôma ohci kîkwây nistam-askîwiyiniwak kâ-mâsihikocik mîna kaskêyihtamâsowiniwâwa. ispîhk 2006, kî-mâcihtâw nistam-askîwiyiniw owiyasowêwikamikwa ôta British Columbia.

kihci-owiyasowêw Buller kî-kâhcitinam kihci-kiskinohamâtowinihk masinahikan mîna opîkiskwêsamâkêwin kâ-kîsihtât ôta Victoria okihci-kiskinhamâtowinihk.

 

Michèle Audette

Oyasowew

ohtâwiya Quebecois êkwa okâwiya Innuwiyinw, owiyasowêw Audette kâ-kî-isi-ohpikit ita mistahi kiskêyihtamowin/pîkiskwêwin ê-pimipayik nîswâyak isi ê-wîhôtahk pimâtisiwin, êwakoni kâ-nîpawîstamawât.

owiyasowêw Audette kî-pîhtokwêw kâ-mâh-mâmawipit mitoni ê-osk-âyawit, nistam ê-nîkânît Quebec nistam-askîwi-iskwêwak kâ-mâmawinitocik êkwa ispîhk kâ-wîcihât ka-âskôwiskawâyit kihci-ôkimâwa ôki kêhci Status of Women mahti ôma kîkway iskwêwak ôta ôkimâwinihk Quebec.

owiyasowêw Audette êkwa ispîhk kî-kwâskwêyihtôtam ôma misiwê kitaskînaw ka-nîkânistamawât ôhi Native Women’s Association of Canada. êwako ôma êkây wîhkâc ê-cahkinikêhitôtahk ka-pîkiskwêstamawât iskwêwa mîna.

opêyakoskânimiyiwa L’École nationale d’administration publique ôkimâwak anohcihkê kî-kocimêwak ê-okiskêyihtamowiniyit ka-oyastâcik ôma wiyasowêwin itêyihtamowin kâ-wî-tôcikâtêk kîkwây nistam-askîwiyiniyiwa ôkimâwinihk ka-âpataniyik.

Brian Eyolfson

owiyasowêw

owiyasowêw Eyolfson ayâw B.Sc. kihci-kiskinohamâtowinihk ohci kâ-miyiht mâmitonêyihcikan kiskêyihtamowin êkwa mîna LL.B. kî-sâpôskam kihci-kiskinohamâtowinihk Queen’s University kâ-isiyihkâtêk mîna LL.M. sôniyâw ka-isi-wiyasowâtiht êkota ohci Osgoode Hall owiyasowêwin kâ-kiskinohamâkâniwik kâ-kiskinohamâhcik. opîkiskwêwstamâkêwak ita. kî-pê-têpwâtâw êkota ta-apit opîkiskwêstamâkêwak kâ-âpacihk piskîci-ôkimâwiwin Ontario êkospîhk 1994 âskîwin.

pâmwayês ka-nawasôniht owiyasowêw Ayolfson kî-itapiw ka-âskôwîskawât ôkimâw pitamâ ôta ôma piskîcikamihk owiyasowêwak kâ-apicik Ontario okimâwiwin kêhci nistam-askîwiyiniwak wîcîsikêmitowin êkwa pônêyihtamowin. êwako mîna âskôwiskam iyiniw ka-kispîhwatiht ohci Ontario, ita kâ-kî-wiyasowâtahk mîna êkây ê-kitâmâkêt ê-nâtamâkêt kâ-mâh-mâciypayik êkospîhk 2007 êkwa 2016. owiyasowêw Eyolfson awa kî-itapiw kayâs otatoskêwi-pîkiskwêstamâkêw ohci ôhi Aboriginal Legal Services ôta Toronto êkota kâ-kî-pîkiskwêstamawât ôhi pokw-ânihi iyiniwa, nistam-askîwiyininawa mîna sôniyâw-owiyasowêwin kî-atoskâtam pâh-pîtos ôhi owiyasowêwikamikwa. êkosi mîna kî-nîpawîstamawêw nistam-askîwiyiniw owiyasowêwin-wîcihiwewin ôta ohci Toronto êkota Ipperwash nanâtonikêwin kâ-kî-ispayik, awasi-ispîhk mîna kî-pîkiskwêstamâkêw Ontario iniyiniw kâ-nâtamâht owiyasowêwin.

owiyasowêw Eyolfson awa otakosiw êkwa ê-âskôwiskâkêt ê-itapit ôma Rotiio> taties, nistami-askîwiyininiwak ka-kakêskimâhcik ôhi owiyasowêwa êkota kâ-kanâtahk pîkiskwêstamâkêwin. êwako mîna omasinahikêwiyiniw Journal of Law and Social Policy kê-icikâtêk masinahikan, kî-kiskinwahamâkew owiyasowêwin pokw-âni iyininiw ohci êkota anihi kâ-ayâcik opîkiskwêstamâkêwak opiskîcikamikowâwa Ontario owiyasowêw Eyolfson otakisow ôma nistam-askîwiyinininâhk Couchiching nistam-askiy kâ-icikâtêk.

 

Qajaq Robinson

owiyasowêw

owiyasowêw Robinson kî-kiskinwahamâkosiw êkota Akitsiraq owiyasowêwin kâ-atoskâcikâtêk kî-icikâtêw – êwako ôma ê-wîcêwâkanihtohk ôki kihci-kiskinwahamâtowina Victoria asici ôma Nunanut ayaskîmîw-askîhk kiskinwahamâtowin nohtaw kispâk kiskinwahamâtowin êwako ê-kî-nihtâwikit Iqaluit ihtâwinihk êkwa ê-kî-ohpikit êkota Igloolik ihtâwin, owiyasowêw Robinson maskawâyiw kîwêtinohk ohci opîkiskwêwin, kâ-isi-pîkiskwêt ôma ê-iskîmîmot êkwa ê-âkayâsîmot. kî-kocîw owiyasowêwinihk êkota Maliiganik Tukisiiniakvik, kî-masinahikêstamawêw owiyasowêwi-ôkimâwa kêhci Nunavut owiyasowêwinihk êwakoni ê-kî-atoskêhikot – Chief Justice Madame Justice Beverley Browne, êkwa ati-nitotisahiwêw kihci-ôkimâskwêwa kêhci ê-kî-papâmi-owiyasowêt misiwê êwako anima askiy Nunavut kê-icikâtêk nêwo-askiy pâmwayês êkospîhk owiyasowêw Robinson kî-wîcêwâkanîwiw ôhi Borden Ladner Gervais LLP Ottawa ôtênaw kâ-ayâyit, Ontario piskîci-askiy, êkota kâ-kî-atoskawât Tem Kewetin, ê-mâmawi-atoskêcik ôki têpakohpomitanaw opîkiskwêstamâkêwak êkos îsi ê-papâmi-atoskêcik kîwêtinohk ôki piskîci-ôkimâwak mîna askîhkâna.

owiyasowêw Robinson mihcêt kîkwây kî-pê-atoskâtam ôhi ohci nistam-askîwiyiniwa okaskihtamâsowiniyiwa. anohc nawac, kî-pîkiskwêstamâkêw êkota ka-kakêskimiwêhk piskic kâ-nititôtamawânawak (owiyasowêwi-wîkimâwin, ê-nâh-nâtat ôhi nistam-askîwiyiniw ihtâwina misiwê ôma kâ-kanâtahk. êkwa mîna, owiyasowêw Robinson awa apiw kâ-wîtapimât onîkânîwa êkota ohci anima Tungasuvvingat Inuit kâ-itisocik, êkây sôniyâwa ohci ka-mâwacihitohk ka-wîcihiwêcik isihcikêwina êkwa miywâyâwinihk ayaskêmêwa kâ-ayâyit Ottawa ôtênaw.